नेपाल आइडलको नयाँ सिजन फागुन २५ बाट

काठमाडौँ । गायन रियालिटी शो नेपाल आइडलको पाँचौँ संस्करण मार्च ८ अर्थात् यही फागुन २५ गतेबाट प्रसारणमा आउने भएको छ । निर्माण संस्था एपीवान टेलिभिजनले बुधबार साँझ एक कार्यक्रमकाबिच प्रदर्शन मिति जानकारी दिएको हो ।

‘जहाँ सङ्गीत जीवन्त हुन्छ’ भन्ने स्लोगन रहेको शो गायनमा नव प्रतिभा खोज्ने उद्देश्यले आयोजना हुँदै आएको हो । यो सिजनको अडिसन समेत सम्पन्न भैसकेको छ । देशभर भएका ओपन अडिसनदेखि जज राउन्ड अडिसन प्रसारण हुनेछ ।

जज राउन्डबाट छानिएका १ सय ५२ जनाले आगामी चरणका लागि प्रतिस्पर्धा गर्नेछन् । यसअघिका संस्करणमा ९० देखि १ सय २० जनासम्म प्रतिस्पर्धी जज राउन्डमा पुगेका थिए । नेपाल आइडलका चौथो संस्करणसम्म सफलतापूर्वक सम्पन्न गरिसकेको एवीवान टेलिभिजन पाँचौँ संस्करण अझ विशेष हुनेमा विश्वस्त छ ।

पाँचौँ संस्करणमा पहिलो, दोस्रो र तेस्रो संस्करणका निर्णायक न्ह्यु बज्राचार्य, कालीप्रसाद बाँस्कोटा र इन्दिरा जोशी नै रहेका छन् । प्रस्तोता आसिफ साह र रिमा विश्वकर्मा रहनेछन् ।

शोको पहिलो चरणको अडिसन झापाको विर्तामोड, महोत्तरीको बर्दिबास, मकवानपुरको हेटौंडा, कैलालीको अत्तरिया, सुर्खेतको वीरेन्द्रनगर, दाङको घोराही र कास्कीको पोखरापछि संघीय राजधानी काठमाडौँमा भएको थियो ।

कार्यक्रममा मेनुका पौडेलको विषयलाई लिएर प्रतिभा चिन्न नसकेको आरोपको विषयमा निर्णायकलाई प्रश्न गरिएको थियो । जसमा निर्णायकहरुले मेनुका पौडेललाई आफूहरूले गरेको प्रतिक्रिया दिए । उनी भोटिङका आधारमा टप ११ बाट बाहिरिएको जानकारी दिए ।

इन्डियन आइडलमा गएर चर्चा कमाएसँगै नेपाल आइडलका निर्णायकमाथि प्रतिभा चिन्न नसकेको भन्ने आरोप ठिक नभएको न्ह्यु बज्राचार्यले बताए ।

त्यस्तै, आइडलकी अर्की निर्णायक इन्दिरा जोशीले मेनुका जस्तै अन्य प्रतिस्पर्धीलाई भारतबाट अफर बारम्बार आउने गरेको बताइन् । उनले भनिन् ‘यसले नेपालमा प्रतिभा धेरै रहेको जानकारी मिल्छ ।