हिजो घटेको सुनको मूल्यमा आज थप गिरावट, चाँदी पनि सस्तियो

काठमाडौं । आज पनि सुनचाँदीकै मूल्यमा थप गिरावट आएको छ। आइतबार घटेको सुनचाँदीकै मूल्य आज फेरि घटेको हो।

नेपाल सुनचाँदी व्यवसायी महासंघका अनुसार आज सुनको मूल्य एक लाख ४९ हजार ३ सय रुपैयाँ कायम भएको छ। सुनको मूल्य आज तोलामा १२ सय रुपैयाँ घटेको हो। आइतबार सुनको मूल्य एक लाख ५० हजार पाँचसय रुपैयाँ थियो।

अघिल्लो साताको सोमबार एकैदिन सुनको मूल्य तोलामा १५ हजार नौसय र अघिल्लो साताको मंगलबार दुई हजार ६ सय रुपैयाँ घटेको थियो।

आज चाँदीको मूल्य पनि प्रतितोला २५ रुपैयाँ घटेको छ। आज चाँदीको मूल्य प्रतितोला एक हजार आठ सय १५ रुपैयाँ कायम भएको छ। आइतबार चाँदीको मूल्य एक हजार ८ सय ४० थियो।

सरकारले भन्सारदर घटाएपछि गत साता सुनचाँदीकै भाउमा उच्च गिरावट आएको छ। गत कात्तिक १५ गते सुनको मूल्यले हालसम्मकै महँगो कीर्तिमान बनाएको थियो। त्यो दिन सुन प्रतितोला १ लाख ७१ हजार रुपैयाँ पुगेको थियो।