मकवानपुरमा संक्रमण हुनेभन्दा कोरोना जित्ने धेरै

मकवानपुर । मकवानपुरमा विहीबार आज कोरोना संक्रमण हुनेभन्दा संक्रमणमुक्त हुने धेरै छन् । पछिल्लो २४ घन्टामा ९९ जनालाई कोरोना संक्रमण पुष्टि हुँदा १ सय ९९ जना संक्रमण मुक्त भएका छन् ।

हेटौंडा उपमहानगरपालिकाका जनस्वास्थ्य निरिक्षक भोला चौंलागाईंका अनुसार २ सय १० जनाबाट संकलित स्वाब परिक्षण गर्दा ५९ जना पुरुष र ४० जना महिलालाई कोरोना भएको हो ।

कोरोना संक्रमण पुष्टि हुनेमा मकवानपुरगढी गाउँपालिकाका १ जना, थाहा नगरपालिकाका १६ जना, मनहरी गाउँपालिकाका ३ जना, भीमफेदी गाउँपालिकाका १ जना र हेटौंडा उपमहानगरपालिकाका ७५ जना रहेका छन् । बाहिरी जिल्लाको ३ जनामा कोरोना भएको छ ।
यस्तै, मकवानपुरमा पछिल्लो २४ घन्टामा १ सय ९९ जनाले कोरोना संक्रमणमुक्त भएका छन् ।

जिल्ला स्वास्थ्य कार्यालय मकवानपुरका अनुसार होम आइसोलेसनबाट १ सय ८२ र संस्थागत आइसोलेसनबाट १८ जनाले कोरोना जितेका हुन् ।
मकवानपुरमा अहिलेसम्म ८ हजार २ सय १३ जनालाई कोरोना पुष्टि भएकोमा २ हजार ४ सय ४४ जना सक्रिय संक्रमित छन् ।
मकवानपुरमा अहिलेसम्म कोरोना भाइरस संक्रमणबाट ८४ जनाको ज्यान गएको छ ।